Tiranë/ Qarkullonte me armë zjarri të fshehur në makinë, arrestohet 41-vjeçari
Policia e Tiranës ka finalizuar operacionin e koduar “Doreza”, duke vënë në pranga një 41-vjeçar që qarkullonte me armë zjarri në automjet.
Gjatë kontrolleve të kryera nga shërbimet e Forcës së Posaçme “Shqiponja”, në bazë të informacioneve të siguruara në rrugë operative dhe në kuadër të monitorimeve 24/7 për parandalimin e veprimtarive të paligjshme, u bë arrestimi në flagrancë i shtetasit L. Sh., 41 vjeç, banues në Tiranë.
Sipas policisë, gjatë kontrollit në automjetin me të cilin ai qarkullonte gjatë natës në rrugën “Selitë e Vogël”, u gjet dhe u sekuestrua një armë zjarri pistoletë me krehër dhe fishekë.
Hetimet zbuluan se 41-vjeçari kishte improvizuar një hapësirë të fshehtë në derën e automjetit, pranë dorezës së drejtuesit, për të fshehur armën.
Materialet procedurale i janë referuar Prokurorisë së Tiranës, për veprime të mëtejshme.
