Tragjedi në Itali: 27-vjeçarja shqiptare gjendet pa jetë, e lidhur pas një peme
Një ngjarje e rëndë ka tronditur komunitetin shqiptar në Itali, pasi 27-vjeçarja Ermela u gjet pa shenja jete në rajonin Molise, në rrethana ende të paqarta. Trupi i saj u zbulua i lidhur pas një peme, duke ngritur dyshime të forta për një akt kriminal.
E reja, e cila ishte nënë e një djali 7-vjeçar, ishte shpallur e zhdukur disa orë më parë nga ish-bashkëshorti i saj, i cili nisi ta kërkonte pas humbjes së kontaktit me të. Ishte pikërisht ai që e gjeti trupin dhe njoftoi menjëherë autoritetet dhe shërbimet mjekësore, por fatkeqësisht ishte tepër vonë për ta shpëtuar.
Ermela ishte e njohur në komunitetin lokal, ku punonte pranë një qendre për emigrantët dhe vlerësohej për përkushtimin e saj si nënë dhe si profesioniste. Të afërmit dhe fqinjët tregojnë se djali i saj ishte qendra e jetës së saj.
Hetimet për zbardhjen e kësaj ngjarjeje horror vijojnë intensivisht, ndërsa autoritetet italiane janë në pritje të rezultateve të autopsisë për të përcaktuar shkakun e saktë të vdekjes.
