Tragjedia në Kuman të Roskovecit/ Fëmijët nuk tërheqin trupin e babait nga morgu, varrimi i çiftit Rrapaj bëhet i ndarë
Familja Rrapaj në fshatin Kuman të Roskovecit ka hapur dyert e mortit pas ngjarjes së rëndë të ndodhur mesditën e djeshme, ku 80-vjeçari Shefit Rrapaj dyshohet se vrau me armë gjahu (pushkë) bashkëshorten e tij, Dashuri Rrapaj, 75 vjeçe, dhe më pas i dha fund jetës.
Sipas burimeve konfidenciale, ceremonia mortore për dy bashkëshortët do të zhvillohet e ndarë. Dashuri Rrapaj do të përcillet për në banesën e fundit në Allambres të Beratit, vendlindja e saj, në orën 13:00.
Ndërkohë, trupi i Shefit Rrapaj ndodhet ende në morgun e Fierit, pasi fëmijët e çiftit nuk kanë pranuar ta tërheqin atë deri në këto momente.
Të nëntë fëmijët e familjes janë mbledhur në banesën ku ndodhi ngjarja dhe, në një gjendje të rënduar emocionale, po përballen me humbjen e dyfishtë të prindërve të tyre.
