Në Qarkun Fier nis viti i ri shkollor me 17,345 nxënës, ndërsa 8 shkolla janë në rikonstruksion
Në bashkitë Fier, Patos, Roskovec dhe Mallakastër, 17,345 nxënës do të ulen në bankat e shkollës për vitin e ri mësimor. Ndërkohë, 8 shkolla në të gjithë qarkun do t’i nënshtrohen rikonstruksionit të plotë, me shkollën 9-vjeçare “Naim Frashëri”, një nga më të mëdhatë në Fier, që është tashmë e gatshme për fillimin e vitit të ri akademik.
Procesi i rikonstruksionit për 7 godinat e tjera do të kryhet gjatë vitit shkollor, duke çuar në zhvendosjen e përkohshme të procesit mësimor në shkolla të tjera. Në Fier, dy godina shkollore do të përfshihen në rikonstruksion: godina nr. 2 e gjimnazit “Janaq Kilica” dhe shkolla 9-vjeçare “Liri Gero”. Po ashtu, rikonstruksioni do të preki shkollat “Jani Nushi”, “Hysen Xheka” dhe “Irakli Bozo” në Lushnje dhe Divjakë, si dhe shkollën “Gjokë Doçi” në Mallakastër dhe “Meleq Gosnishti” në Patos.
Zyra Rajonale e Arsimit në Fier ka njoftuar se nuk ka asnjë mësues të papunë dhe as shkolla të mbyllura për këtë fillim viti shkollor. Megjithatë, numri i nxënësve të regjistruar rishtazi në klasën e parë ka pësuar një rënie, duke reflektuar një trend të vazhdueshëm në uljen e regjistrimeve për këtë nivel arsimor.
