Vlorë – Arrestohen 2 autorë vjedhjesh brenda 24 orëve, njëri në kërkim për një tjetër rast në Elbasan
Komisariati i Policisë Vlorë ka finalizuar me sukses dy operacione të njëpasnjëshme në fushën e vjedhjes, brenda një harku kohor prej 24 orësh. Operacionet e koduara “Trace” dhe “Strike” çuan në arrestimin e dy shtetasve të dyshuar për disa raste vjedhjesh në qytetin e Vlorës.
Operacioni “Trace”
Në kuadër të këtij operacioni, u arrestua shtetasi A. C., 40 vjeç, banues në Elbasan. Ai akuzohet si autor i tre vjedhjeve të ndodhura në subjekte të ndryshme tregtare në lagjet “10 Korriku” dhe “Pavarësia 2” të qytetit të Vlorës.
Gjithashtu, A. C. ishte në kërkim për një tjetër vjedhje të ndodhur më herët në Elbasan, në një subjekt të llojit “tabakino”. Gjatë operacionit, u sekuestruan sende të vjedhura dhe mjete të përdorura për kryerjen e vjedhjeve.
Operacioni “Strike”
Ndërkohë, në një tjetër rast të dokumentuar më 02.05.2025, u arrestua shtetasi B. Ç., 41 vjeç, banues në Vlorë. Ai dyshohet se në lagjen “10 Korriku” ka vjedhur me dhunë dy varëse floriri dhe çantën e një shtetaseje, në të cilën ndodheshin 16,000 lekë dhe sende të tjera personale.
Materialet procedurale për të dy rastet u referuan në Prokurorinë pranë Gjykatës së Shkallës së Parë të Juridiksionit të Përgjithshëm Vlorë, për vijimin e veprimeve ligjore.
