Vlorë – Finalizohet operacioni policor “Nightfall”, sekuestrohet armë me silenciator, arrestohen dy persona
Policia e Vlorës ka finalizuar me sukses operacionin policor të koduar “Nightfall”, për goditjen e një rasti të armëmbajtjes pa leje.
Si rezultat i këtij operacioni, të zhvilluar mbrëmjen e djeshme në aksin Orikum-Vlorë, në Radhimë, u ndalua një automjet tip “Mercedes Benz”, ku udhëtonin dy shtetas.
Gjatë kontrollit, pasagjeri hodhi nga automjeti një çantë dhe tentoi të largohej me vrap, por u kap menjëherë nga shërbimet e Policisë. Në çantë u gjet një pistoletë me silenciator, e cila u sekuestrua në cilësinë e provës materiale.
Në përfundim të veprimeve hetimore, u arrestuan në flagrancë:
• P. K., 19 vjeç, banues në Orikum, për veprën penale “Mbajtja pa leje dhe prodhimi i armëve, armëve shpërthyese dhe i municionit”;
• B. K., 34 vjeç, banues në Orikum, për veprën penale “Moskallëzim i krimit”.
Operacioni u krye nga Sektori për Hetimin e Krimeve të Rënda i DVP Vlorë, në bashkëpunim me Seksionin për Mbështetjen Operacionale të Hetimit, bazuar në informacione të siguruara në rrugë operative.
Materialet procedurale iu referuan Prokurorisë, e cila po vijon hetimet për rastin.
