Vlorë/ Finalizohet operacioni “React”, arrestohet 40-vjeçari që mbante armë dhe municion në banesë
Policia e Vlorës ka goditur një tjetër rast të armëmbajtjes pa leje, në kuadër të operacionit policor të koduar “React”, i zhvilluar mbi bazën e informacioneve operative.
Gjatë veprimeve hetimore dhe kontrollit të ushtruar në banesën e një shtetasi në lagjen “4 Heronjtë”, shërbimet e Policisë gjetën të fshehur një armë zjarri automatike tip “AK-47” dhe një krehër me 29 fishekë.
Si rezultat, u arrestua në flagrancë:
• H. M., 40 vjeç, banues në Vlorë.
Arma dhe municioni u sekuestruan në cilësinë e provës materiale, ndërsa materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për vijim të hetimeve.
Policia njofton se operacionet për goditjen e armëmbajtjes pa leje do të vijojnë me intensitet të lartë, me synim parandalimin e ngjarjeve kriminale.
