Zbulohen detaje të reja për dhunimin e avokatit Kujtim Cakrani: Një autor i identifikuar, tjetri në kërkim
Gazetarja Anila Hoxha ka dhënë detaje të reja lidhur me dhunimin e avokatit Kujtim Cakrani, i cili përfaqëson edhe ish-presidentin Ilir Meta.
Në emisionin “Breaking” në Top News, Hoxha bëri me dije se një nga autorët e dyshuar të ngjarjes është shtetasi Skerdilajd Xhindi, ndërsa personi i dytë ende nuk është identifikuar, pavarësisht këqyrjes së kamerave të sigurisë. Të dy dyshohet se janë përfshirë në aktin e dhunës dhe aktualisht ndodhen në kërkim nga policia.
Sipas hetimeve paraprake, konflikti dyshohet se ka nisur për një vend parkimi, megjithatë autoritetet nuk përjashtojnë edhe pista të tjera, të cilat mund të kenë lidhje me detyrën e avokatit Cakrani.
Gazetarja Hoxha theksoi se avokati është goditur në pjesën e kokës me doreza hekuri, ndërsa policia vijon hetimet për zbardhjen e plotë të rrethanave të ngjarjes.
