Zgjedhjet Parlamentare 2025 në Qarkun Fier, test për partitë e mëdha (PS-PD) dhe provë realiteti për të voglat
Nga Vladimir Muçaj:
Zgjedhjet Parlamentare 2025 në Qarkun Fier: Test për partitë e mëdha dhe provë realiteti për të voglat
Zgjedhjet për Kuvendin në vitin 2025 përbëjnë një moment kyç në jetën politike të vendit dhe, ndër qarqet më vendimtare, Qarku i Fierit shquhet për rolin që luan në përcaktimin e balancave politike. Ky qark do të jetë një test i rëndësishëm për partitë e mëdha dhe një provë e vështirë për partitë e reja apo të vogla, të cilat synojnë të fitojnë terren në një hapësirë elektorale të konsoliduar.
Partitë e mëdha, si Partia Socialiste dhe Partia Demokratike, përballen me një sfidë të dyfishtë: të mbajnë bazën ekzistuese dhe të dëshmojnë se kanë ende kapacitet për të përfaqësuar interesin publik me seriozitet, program dhe qëndrueshmëri. Këto zgjedhje do të matin jo vetëm forcën e strukturave, por edhe besimin që ato kanë ruajtur ndër vite. Votuesit janë më të ndërgjegjshëm, më kritikë dhe më kërkues. Prandaj, rezultatet nuk do të pasqyrojnë thjesht aritmetikë politike, por nivelin e angazhimit konkret ndaj komunitetit.
Ndërkohë, për partitë e vogla dhe ato të sapokrijuara, këto zgjedhje janë një sfidë ekzistenciale. Ato nuk do të mund të mbështeten në retorikë apo simbolikë, por do të duhet të dëshmojnë aftësi organizative, seriozitet programor dhe ndershmëri përfaqësimi. Qarku i Fierit, për shkak të ndjeshmërisë dhe kompleksitetit të tij shoqëror, është një terren që nuk fal amatorizmin politik. Votuesit në këtë zonë kërkojnë përfaqësim të vërtetë, zgjidhje konkrete dhe lidership të besueshëm. Prandaj, kush arrin të fitojë besimin e këtij elektorati, fiton legjitimitet kombëtar.
Në këtë kontekst, nuk mund të anashkalohet roli vendimtar i znj. Belinda Balluku, drejtueses politike të PS për Qarkun Fier. Me një qasje të bazuar në punë konkrete dhe kontakt të drejtpërdrejtë me komunitetin, znj. Balluku ka kthyer Partinë Socialiste në një forcë të padiskutueshme në këtë qark. Menaxhimi efikas i strukturave, ndërtimi i një narrative zhvillimi dhe lidhja e vazhdueshme me nevojat reale të qytetarëve janë faktorët që e bëjnë atë një nga figurat më ndikim-mëdha në fushën elektorale të Fierit.
Rezultati që do të prodhojnë zgjedhjet në këtë qark do të jetë më shumë sesa një përfaqësim numerik në Kuvend – do të jetë një tregues i qartë i drejtimit që qytetarët duan për vendin. Për partitë e mëdha, është një test përgjegjshmërie. Për të voglat, një provë realiteti. Dhe për qytetarët e Fierit, një mundësi për të përcaktuar vetë standardin e politikës që meritojnë. /Newsalbania
