Zhduket 58-vjeçari në Prrenjas, dyshohet se është vetëmbytur në rezervuar
Një ngjarje e rëndë është regjistruar në Prrenjas. Një 58 vjeçar në Prrenjas i identifikuar si Xh.D, dyshohet se është mbytur në rezervuar. Denoncimi është bërë nga kushëriri i tij Y.M i cili rreth orës 01:00 të mëngjesit të sotëm ka telefonuar në polici për të treguar se ai dhe familjarë të tjerë kishin gjetur veshjet dhe biçikletën e 58 vjeçarit jashtë rezervuarit.
Njoftimi i policisë Prrenjas
Rreth orës 01:00, të mëngjesit të sotëm, shtetasi Y. M. ka njoftuar sallën operative, se dyshonte se kushëriri i tij, shtetasi Xh. D., 58 vjeç, banues në fshatin Katjel, ishte vetëmbytur në rezervuarin e Prrenjasit, pasi në afërsi të rezervuarit, ai dhe familjarë të tjerë kishin gjetur veshjet dhe biçikletën e 58-vjeçarit. Gjithashtu, shtetasi Y. M. ka njoftuar se 58-vjeçari ishte larguar nga banesa, mëngjesin e djeshëm.
Menjëherë pas njoftimit, shërbimet e Policisë, së bashku me familjarë, kanë nisur kërkimet përgjatë rrjedhës së rezervuarit. Gjithashtu, me qëllim gjetjen e trupit të shtetasit Xh. D., janë nisur polumbarët e RENEA-s.
Ndërkaq, një grup i posaçëm hetimor vijon punën për dokumentimin me prova ligjore të rrethanave të rastit.
