Zhdukja e 3-vjeçarit në Durrës, dyshohet se gjyshi e di vendndodhjen, 22-vjeçarja: Dua djalin tim
Vazhdojnë kërkimet për gjetjen e vogëlushit 3-vjeçar i cili që prej ditës së shtunë është marrë nga gjyshërit dhe nuk i është kthyer së ëmës.
Bahrie Gjuni, 54 vjeçe, dhe nipi i saj rezultojnë “të zhdukur” pa gjurmë, ndërsa nëna e fëmijës Ile Gjuni qëndron në ankth dhe lutet që fëmija t’i kthehet sa më shpejt.
Pas denoncimit publik të rastit nga nëna e fëmijës, 22-vjeçarja Ile Gjuni, policia deklaroi se Rexhep Gjuni, gjyshi i djalit, është proceduar penalisht për “marrjen pa të drejtë” të fëmijës, ndërsa kontrollet për gjetjen e tij po vazhdojnë me intensitet në të gjitha zonat e mundshme ku gjyshi ka deklaruar se mund të ketë shkuar bashkëshortja e tij bashkë me nipin. Po pa rezultat.
Dyshohet se gjyshi e di vendndodhjen e tyre, po qëllimisht i orienton kërkimet në drejtime të tjera, duke dëmtuar kërkimin dhe gjetjen e fëmijës nga ana e policisë.
Duke qenë se çështja konsiderohet tejet e ndjeshme për shkak të ngjarjeve në familjen Gjuni, që në shkurt të vitit 2023 humbi njërin nga dy djemtë, policia është treguar e kujdesshme në trajtimin e rastit, ndërkohë që nëna tejet e dëshpëruar pret të marrë në krah fëmijën e saj.
Ile Gjuni thotë se nuk ka dijeni ku mund ta ketë çuar dhe lutet që fëmija të jetë mirë, në shëndet të plotë dhe t’i kthehet sa më parë.
Ajo hedh poshtë pretendimet për konflikt mes saj dhe gjyshërve të djalit në lidhje me përfitimet pasurore pas vdekjes së bashkëshortit.
“Nuk u kam kërkuar asgjë dhe s’më kanë dhënë asgjë. Dua vetëm djalin tim”, deklaron ajo ndërsa qëndron e lidhur pas telefonit në pritje të lajmit të mirë.
