Zjarr i madh në zonën e Llamanit në Himarë, në terren zjarrfikësit dhe Emergjencat Civile
Një zjarr i përmasave të mëdha ka rënë pasditen e kësaj të hëne në kodrat e zonës së Llamanit, në jug të qytetit të Himarës, duke përfshirë sipërfaqe të konsiderueshme me shkurre dhe bimësi.
Menjëherë pas marrjes së njoftimit, në vendngjarje janë angazhuar mbi 17 efektivë të shërbimit zjarrfikës, forca të Policisë së Himarës, si edhe strukturat e Emergjencave Civile, të cilat po punojnë intensivisht për izolimin dhe shuarjen e vatrës së zjarrit.
Sipas informacioneve paraprake, ndërhyrja po vështirësohet nga temperaturat e larta dhe erërat e forta, të cilat favorizojnë përhapjen e flakëve në terrenin kodrinor. Autoritetet kanë përqendruar përpjekjet në mbajtjen nën kontroll të situatës dhe parandalimin e avancimit të zjarrit drejt zonave të banuara.
Operacioni për shuarjen e flakëve vijon, ndërsa deri në këto momente nuk raportohet për persona të lënduar apo banesa të prekura nga zjarri. Autoritetet mbeten në gatishmëri deri në neutralizimin e plotë të vatrës.
