Zjarr masiv në pyllin mes Patosit dhe Mallakastrës – Ndërhyjnë Emergjencat dhe helikopteri
Një zjarr i përmasave të mëdha ka përfshirë një sipërfaqe të konsiderueshme pylli me pisha, në zonën midis fshatrave Lofkënd dhe Drenie, në kufirin administrativ të bashkive Patos dhe Mallakastër.
Flakët kanë shpërthyer prej ditës së djeshme dhe janë përhapur me shpejtësi për shkak të erës dhe temperaturave të larta. Në terren ndodhen forcat e Emergjencave Civile, zjarrfikësit e dy bashkive, si dhe punonjës të shërbimeve të tjera mbështetëse që prej orëve të para të mëngjesit.
Për të frenuar përhapjen e zjarrit është angazhuar edhe një helikopter, ndërhyrja e të cilit ka ndihmuar ndjeshëm në izolimin e disa prej vatrave më aktive.
Autoritetet po punojnë me intensitet për të vënë flakët nën kontroll dhe për të shmangur dëmtimin e mëtejshëm të sipërfaqes pyjore, që ka rëndësi të veçantë për ekosistemin lokal.
Ndërkohë, dyshohet se zjarri mund të jetë i qëllimshëm. Policia ka nisur hetimet për zbardhjen e plotë të ngjarjes, ndërsa ka bërë thirrje për ndërgjegjësim dhe rikujton se zjarrvënia e qëllimshme përbën vepër penale, e ndëshkueshme sipas Kodit Penal.
