Zjarri në Drenovë, Kryebashkiaku i Mallakastrës nga terreni rreth mesnatës: E patolerueshme pakujdesia e fermerëve – rrezikohen puset e naftës dhe nënstacioni elektrik
Zjarri i riaktivizuar në zonën e Drenovës në Mallakastër ka marrë përmasa të mëdha, duke kërcënuar puset e naftës, një magazinë dhe një nënstacion elektrik. Kryebashkiaku i Mallakastrës, Qerim Ismailaj, ndodhej në terren rreth mesnatës për të monitoruar nga afër operacionin dhe deklaroi se “është e patolerueshme që pakujdesia e fermerëve gjatë djegies së mbeturinave të shkaktojë dëme kaq të mëdha”.
Sipas tij, falë ndërhyrjes së menjëhershme të shërbimeve zjarrfikëse të Albpetrolit, është bërë e mundur që përhapja e flakëve të vihet nën kontroll. Pavarësisht errësirës dhe terrenit të vështirë, puna për shuarjen e zjarrit vijon pa ndërprerje.
Ndërkohë, autoritetet vendore po vlerësojnë situatën për të kërkuar ndihmë nga forcat e ushtrisë, si dhe ndërhyrje nga ajri për izolimin e plotë të dy vatrave ende aktive.
