29 vjet nga rënia në krye të detyrës, përkujtohen katër efektivët e Policisë së Shtetit në Dimal
Me rastin e 29-vjetorit të rënies në krye të detyrës të efektivëve të Policisë së Shtetit Miltiadh Koço, Arjan Shemuni, Asllan Selamaj dhe Ilia Banaj, Drejtoria Vendore e Policisë Berat, në bashkëpunim me Bashkinë Dimal, organizoi një ceremoni përkujtimore në nderim të veprës dhe sakrificës së tyre.
Ceremonia u zhvillua pranë Memorialit të të Rënëve në qytetin e Dimalit, ku morën pjesë familjarë të dëshmorëve, përfaqësues të pushtetit vendor, drejtues të Policisë së Beratit dhe punonjës policie.
Në shenjë respekti dhe mirënjohjeje për kontributin e tyre, pranë memorialit u vendosën kurora me lule, ndërsa gjatë aktivitetit u mbajtën fjalë përkujtimore kushtuar jetës dhe veprimtarisë së katër efektivëve që humbën jetën në krye të detyrës 29 vite më parë.
Të pranishmit mbajtën gjithashtu një minutë heshtje në nderim të kujtimit të tyre.
Policia e Shtetit vlerëson se sakrifica e dëshmorëve mbetet një shembull frymëzimi për çdo efektiv, duke shërbyer si motivim për përmbushjen me përkushtim të misionit në mbrojtje të rendit, sigurisë publike dhe qytetarëve.
Kujtimi i tyre mbetet i përjetshëm në historinë e Policisë së Shtetit.
