55 vite Teatri “Bylis”/ Nga “Hijet e natës” te brezat e artistëve: historia e një skene që u bë pjesë e shpirtit të Fierit
Fier – Më 1 tetor 1971, në qytetin e Fierit ngrihej për herë të parë sipër skena e Teatrit “Bylis”. Një trupë e re profesioniste, një shfaqje e parë dhe një sallë e mbushur me spektatorë do të shënonin nisjen e një prej historive më të rëndësishme të jetës kulturore të qytetit. 55 vite më pas, fotografitë e asaj kohe rikthejnë emocionet e një epoke kur teatri ishte një nga vendet ku mblidhej i gjithë qyteti.
Ishte dita kur trupa profesioniste e krijuar disa muaj më parë nisi zyrtarisht rrugëtimin e saj. Në skenën e re të Fierit u ngjit për herë të parë drama “Hijet e natës”, e autorit Vedat Kokona, duke shënuar shfaqjen e parë të Teatrit “Bylis”.
Regjia e premierës së parë iu besua Leka Bungos, ndërsa në skenë interpretuan aktorët Leonard Poro, Fitnete Tiço, Imelda Kiri, Shpëtim Shehu, Kujtim Jorgaqi, Suzana Prifti, Hatiqet Siqeca, Nestor Pogaçe, Koço Papadhopulli dhe Antigoni Golemi.
Skenografia e shfaqjes u përgatit nga Agim Zajmi.
Pas premierës në Fier, trupa e re nisi edhe turneun e saj të parë në qytete të ndryshme të Shqipërisë. Ishte vetëm fillimi i një rrugëtimi të gjatë, që shumë shpejt do ta kthente “Bylis”-in në një nga trupat teatrore më të njohura në vend.
Që prej asaj dite, në skenën e “Bylis”-it kanë kaluar breza aktorësh, regjisorësh dhe artistësh. Janë interpretuar drama, komedi e vepra që kanë sjellë në Fier histori, emocione dhe personazhe të paharrueshme.
55 vite nuk janë thjesht një numër. Janë 55 vite duartrokitje, emocione, premierash, kujtimesh dhe netësh të gjata nën dritat e skenës.
Nga ajo premierë e parë e “Hijeve të natës” deri te shfaqjet e ditëve të sotme, historia e Teatrit “Bylis” është edhe një pjesë e historisë kulturore të Fierit.
🎭 55 vite “Bylis”. 55 vite skenë. 55 vite histori.
Dhe skena vazhdon të flasë.
