PAMJE TË RËNDA/ Gjendet i pajetë në përrua biznesmeni 27-vjeçar i rrëmbyer, u gjet i vrarë me 7 plumba…
Një ngjarje e rëndë ka tronditur zonën e Nea Peramos në Greqi, ku pasditen e së dielës u gjet trupi i pajetë i një biznesmeni 27-vjeçar, i raportuar i zhdukur prej rreth një jave.
Trupi i viktimës u zbulua pranë një përrua afër Manastirit të Trinisë së Shenjtë, ndërsa hetimet paraprake tregojnë se i riu ishte rrëmbyer nga banesa e tij në Elefsina, në orët e para të së hënës së kaluar.
Sipas autoriteteve, rrëmbyesit e kanë transportuar 27-vjeçarin në një zonë të izoluar, ku ai është ekzekutuar me të paktën shtatë plumba. Pas vrasjes, autorët dyshohet se kanë tentuar t’i vënë flakën trupit për të zhdukur gjurmët e krimit, por pa sukses.
Pamjet filmike të publikuara nga protothema.gr tregojnë momentet para rrëmbimit. Në video, biznesmeni shihet duke u kthyer në shtëpi në këmbë rreth orës 02:01 të mëngjesit të 26 janarit, i veshur me kostum gri dhe bluzë me kapuç blu. Sapo futet në rrugicën pranë pallatit ku jetonte me partneren e tij, një automjet blu i afrohet nga drejtimi i kundërt. Brenda ndodheshin katër persona, të cilët nën kërcënimin e armës e detyrojnë të hipë në makinë dhe largohen.
Pamjet e kamerave të sigurisë u dorëzuan nga partnerja e viktimës, e cila denoncoi rrëmbimin. Pas verifikimeve, policia konstatoi se automjeti i përdorur ishte i vjedhur në Selanik.
Hetuesit janë përqendruar tashmë në zbardhjen e motivëve të krimit. Skenari i një rrëmbimi për shpërblim është përjashtuar, pasi nuk ka pasur asnjë kërkesë financiare, pavarësisht pasurisë së viktimës. Dyshohet se vrasja mund të lidhet me mosmarrëveshje financiare.
Autoritetet po shqyrtojnë gjithashtu ngjashmëri me një tjetër ngjarje të ndodhur në vitin 2024, kur një biznesmen u vra dhe trupi i tij, së bashku me automjetin e rrëmbimit, u dogj në zonën pyjore të Mandrës.
Hetimet vijojnë, ndërsa autorët mbeten ende në kërkim dhe motivet e vrasjes nuk janë zbardhur plotësisht.
