Atentati në Rrilë të Lezhës/ Me urdhër të Prokurorisë ndalohet një punonjës policie, iu kundërpërgjigj me armë autorëve të sulmit
Me urdhër të Prokurorisë është ndaluar një punonjës policie me iniciale B.K., në lidhje me atentatin e ndodhur në Rrilë të Lezhës, ku mbeti i plagosur 21-vjeçari Merando Nikulaj.
Sipas burimeve zyrtare, efektivi i policisë akuzohet për veprën penale “Shpërdorim i detyrës”, pasi në momentin e atentatit ka qenë prezent brenda berberhanes ku ndodhej i riu, i cili ishte shënjestra e sulmit me armë zjarri.
Gjatë ngjarjes, mësohet se punonjësi i policisë ka kundërpërgjigjur me armë zjarri ndaj autorëve të atentatit.
Në lidhje me këtë ngjarje të rëndë, policia vijon kontrolle të shumta dhe intensive në qytetin e Lezhës, në kuadër të hetimeve për identifikimin dhe kapjen e autorëve.
Hetimet po ndiqen nga Prokuroria, ndërsa priten detaje të tjera në vijim.
