Procedim penal për 4 punonjës të Albpetrol pas ndotjes me hidrokarbure të lumit Vjosa
Pas denoncimit të publikuar nga Fieriweb.com për ndotjen e Lumit Vjosa, autoritetet kanë ndërmarrë verifikime në terren, duke çuar në nisjen e një procedimi penal ndaj 4 punonjësve të kompanisë Albpetrol.
Sipas njoftimit zyrtar të Drejtoria Vendore e Policisë Fier, specialistët e Seksionit për Hetimin e Krimeve Ekonomike kanë referuar materialet në Prokurori, ku ka nisur procedimi penal ndaj shtetasve me iniciale:
- Z. T., 59 vjeç
- A. Z., 57 vjeç
- G. B., 52 vjeç
- G. N., 52 vjeç
Këta shtetas, në cilësinë e punonjësve të kompanisë së nxjerrjes së naftës, dyshohet se nuk kanë marrë masat e nevojshme për mirëmbajtjen dhe riparimin në kohë të një linje të dëmtuar të tubacionit të naftës. Si pasojë, është shkaktuar rrjedhje e hidrokarbureve, duke sjellë ndotje të konsiderueshme të mjedisit dhe veçanërisht të ujërave të lumit Vjosa.
Burime bëjnë me dije se ndotja është evidentuar pas ankesave të banorëve dhe denoncimeve të publikuar nga mediat, çka ka nxitur ndërhyrjen e strukturave përkatëse dhe nisjen e hetimeve për të përcaktuar përgjegjësitë konkrete.
Materialet procedurale i janë referuar Prokurorisë së Fierit, e cila pritet të vijojë me veprimet e mëtejshme hetimore për zbardhjen e plotë të kësaj çështjeje dhe për marrjen e masave ligjore ndaj personave përgjegjës.
