Mister në Britani, skeleti i një foshnje i mbështjellë me gazetë të vitit 1910 mund të jetë mbi 300 vjeç
Një rast i pazakontë dhe misterioz ka dalë në dritë në Britaninë e Madhe, ku skeleti i një foshnje është gjetur i mbështjellë me një gazetë të vitit 1910 dhe me një spango të lidhur rreth qafës, mund të jetë shumë më i vjetër sesa mendohej fillimisht.
Rasti u shqyrtua në një seancë paraprake hetimore në gjykatën e koronerit në Crook, në qarkun County Durham, ku foshnja është regjistruar si “Baby Auckland”, raporton The Guardian.
Mbetjet skeletore u zbuluan në vitin 2024 nga një punëtor, nën dyshemenë e një shtëpie viktoriane në Bishop Auckland. Fillimisht u mendua se foshnja i përkiste periudhës së gazetës me të cilën ishte mbështjellë, por hetimet shkencore kanë ndryshuar rrënjësisht këtë supozim.
Sipas analizave me radiokarbon, foshnja ka gjasa të ketë qenë gjallë në një periudhë shumë më të hershme, mes viteve 1726 dhe 1812, duke e thelluar edhe më shumë misterin rreth rastit.
Koroneri i lartë, Jeremy Chipperfield, ka lejuar lirimin e mbetjeve për t’i dhënë foshnjës një ceremoni funerale dinjitoze, ndërsa autopsia nuk ka mundur të përcaktojë shkakun e vdekjes.
Policia u përfshi në hetim menjëherë pas zbulimit dhe arriti në përfundimin se mbetjet kishin qëndruar të paprekura për një periudhë shumë të gjatë. Për shkak të gazetës së vitit 1910, hetuesit po përpiqen të gjurmojnë historikun e pronës dhe banorët e saj në periudhën 1900-1920.
Shefi i hetimeve, DCI Mel Sutherland, deklaroi se prioritet mbetet identifikimi i foshnjës dhe zbardhja e rrethanave të ngjarjes.
Sipas të dhënave të paraqitura në seancë, foshnja ishte mashkull, fakt i konfirmuar nga analizat e ADN-së, ndërsa spangoja ishte e lidhur tre herë rreth qafës së tij. Gazeta me të cilën ishte mbështjellë rezulton të jetë një botim i 19 qershorit 1910, i gazetës “Umpire”.
Ekspertët besojnë se skeleti i përket një foshnje të lindur në term të plotë, rreth 40 javë, por nuk është e qartë nëse ai ka lindur i gjallë apo jo.
Ceremonia mortore për foshnjën është planifikuar të mbahet më 27 prill në Bishop Auckland. Hetimet do të rifillojnë më 18 maj, me shpresën për të hedhur më shumë dritë mbi këtë ngjarje të pazgjidhur.
