Norvegjezi kapet me kok*inë në Patos, arrestohet 28-vjeçari që banonte me qira në Sheqishte
Një 28-vjeçar nga Norvegjia është vënë në pranga nga Policia e Fierit, pasi dyshohet se ushtronte veprimtarinë kriminale të shpërndarjes së drogave të forta në zonën e Patosit.
Specialistët e Seksionit për Hetimin e Narkotikëve në DVP Fier, në bashkëpunim me Forcën e Posaçme “Shqiponja”, finalizuan operacionin duke kapur në flagrancë shtetasin Sebastian Temples, 28 vjeç, i cili banonte përkohësisht në një ambient të marrë me qira në fshatin Sheqishte, Patos.
Gjatë kontrollit të ushtruar ndaj tij dhe automjetit me qira që drejtonte, shërbimet e Policisë gjetën dhe sekuestruan një sasi lënde të dyshuar narkotike kokainë, e cila dyshohet se ishte siguruar për t’u shpërndarë me qëllim përfitimi financiar.
Materialet procedurale i kaluan Prokurorisë pranë Gjykatës së Shkallës së Parë Fier për veprime të mëtejshme, për veprën penale “Prodhimi dhe shitja e lëndëve narkotike”.
