Kronologjia e sulmit në darkën me gazetarët/ Të ftuarit u fshehën nën tavolina, si Shërbimi Sekret evakuoi Donald Trump dhe Melanian

Një incident i rëndë sigurie ndodhi mbrëmjen e së shtunës, gjatë një darke të organizuar ku merrte pjesë Donald Trump, kur një person i armatosur tentoi të hynte në ambient dhe u arrestua pasi qëlloi ndaj një efektivi të forcave të rendit.

Më pas, presidenti amerikan foli për një veprim të një “vrasësi të mundshëm”, duke theksuar se demokracia është vënë vazhdimisht në shënjestër të sulmeve të tilla.

“Nuk është hera e parë në vitet e fundit që Demokracia jonë sulmohet nga një vrasës i mundshëm që synon të vrasë”, deklaroi Trump, ende i veshur me smoking, gjatë një konference për shtyp në Shtëpinë e Bardhë, rreth dy orë pas incidentit.

Përballë tij ndodheshin gazetarë me papion dhe fustane mbrëmjeje, të cilët, si ai, ishin të ftuar në këtë darkë ku merr pjesë elita e politikës dhe medias në Uashington.

Presidenti sqaroi se një efektiv i forcave të rendit u plagos nga të shtënat, ndërsa më vonë u bë e ditur se jeta e tij nuk është në rrezik.

Sipas tij, autori i identifikuar si Cole Allen ishte një “ujk i vetmuar” dhe “i çmendur”. Sipas CBS News, duke cituar dy burime, ai u tha policëve pas arrestimit se donte të qëllonte zyrtarë të administratës Trump.

Kronologjia e sulmit

Darka vjetore e Shoqatës së Korrespondentëve të Shtëpisë së Bardhë sapo kishte nisur, sipas gazetarëve të AFP që ndodheshin në sallë, kur u dëgjua një trazirë e madhe pranë hyrjeve.

U dëgjuan thirrje “Poshtë! Poshtë!”. Të ftuarit u shtrinë ose u ulën në tokë dhe u futën nën tavolina, ndërsa shumë prej tyre mbanin telefonat lart për të filmuar.

Presidenti dhe zonja e parë Melania Trump, të cilët ndodheshin në tavolinën qendrore në një platformë të ngritur, u larguan menjëherë nga shërbimet e sigurisë.

Agjentë të Secret Service hynë në sallë të armatosur rëndë. Forcat e rendit urdhëruan më pas të gjithë të pranishmit gazetarë, ministra, politikanë dhe personalitete të largoheshin nga salla e madhe në katin e parë nëntokësor të hotelit.

Në pamje të AFP, Trump shihet i ulur në tavolinën e nderit me nënpresidentin J.D. Vance dhe zëdhënësen Karoline Leavitt, ndërsa fillimisht zhurmat nuk shkaktojnë reagim.

Vetëm pak sekonda më vonë, të pranishmit kuptojnë se bëhet fjalë për incident, ndërsa shqetësimi shihet qartë në fytyrën e Melania Trump.

Agjentët ndërhyjnë menjëherë, e largojnë presidentin nga skena dhe muzika ndalon. Agjentë të tjerë kalojnë mbi tavolina dhe drejtojnë armët drejt turmës.

Policia rrethoi zonën, ndërsa helikopterë fluturonin mbi qendrën e kryeqytetit.

Shoqata e Korrespondentëve të Shtëpisë së Bardhë organizon çdo pranverë këtë darkë ku marrin pjesë qindra figura publike. Trump, i cili shpesh sulmon median, po merrte pjesë për herë të parë si president.

“Të shtënat nuk do të më ndalin në luftën me Iranin”

“Kjo nuk do të më pengojë të fitoj luftën me Iranin”, deklaroi Trump disa orë pas incidentit.

“Nuk e di nëse kishte ndonjë lidhje me këtë, sinqerisht nuk e besoj, bazuar në atë që dimë”, shtoi ai.

Pak minuta më herët kishte thënë “kurrë nuk e di njeriu”, kur u pyet nëse të shtënat lidhen me luftën në Iran, të cilën e nisi më 28 shkurt së bashku me Izraelin.

“Bëj një punë të rrezikshme”

Trump foli edhe për rritjen e dhunës politike në nivel global.

“Asnjë vend nuk është i paprekshëm”, deklaroi ai.

Ai e përshkroi postin e presidentit si një profesion të rrezikshëm, duke theksuar se politikat e tij e bëjnë objektiv.

“Është pjesë e lojës”, tha ai, duke shtuar: “Do të vazhdojmë të bëjmë një punë shumë të mirë. Kjo është e vetmja gjë që mund të bëj”.

Ai shtoi se fillimisht mendoi se zhurma vinte nga rënia e një tabakaje dhe bëri shaka se herën tjetër darka do të jetë “më e sigurt”.

“Shumë armë”

Pak para konferencës, Trump publikoi në Truth Social pamje nga kamerat e sigurisë që tregojnë një burrë duke kaluar me forcë nëpër kontrollin e sigurisë në hyrje të sallës.

“Ishte, në një farë mënyre, shumë e bukur të shihje një burrë që hyn me shumë armë në një pikë kontrolli dhe të neutralizohej nga disa anëtarë shumë të guximshëm të Secret Service që vepruan shumë shpejt”, deklaroi ai.

Ai kritikoi gjithashtu hotelin Hilton në Uashington, duke thënë se “nuk është një ndërtesë shumë e sigurt”, por shtoi se mekanizmi i sigurisë funksionoi mirë dhe ndaloi autorin përpara se të hynte në sallë.

Autori para drejtësisë

Autoritetet amerikane njoftuan se autori do të dalë para gjykatës të hënën. Ai përballet me dy akuza: përdorim të armës së zjarrit në krim të dhunshëm dhe sulm ndaj një agjenti federal me armë të rrezikshme.

Autori është identifikuar si Cole Allen, 31 vjeç, nga Torrance, Kaliforni.

Sipas autoriteteve, ai punon si mësues dhe hyri në hotelin ëashington Hilton duke u drejtuar drejt sallës ku ndodheshin rreth 2.500 të ftuar, përfshirë presidentin dhe anëtarë të qeverisë.

Një profil në LinkedIn e paraqet si mësues me kohë të pjesshme në C2 Education. Kompania e kishte shpallur “mësues i muajit” në dhjetor 2024.

Sipas të njëjtit profil, ai u diplomua në inxhinieri mekanike në Caltech në vitin 2017 dhe vitin e kaluar përfundoi master në shkenca kompjuterike.

Gjatë studimeve kishte marrë pjesë në zhvillimin e një prototipi frenimi emergjent për karroca invalidësh.

Sipas të dhënave të Federal Election Commission, ai kishte dhuruar 25 dollarë për fushatën e Kamala Harris në tetor 2024.