Defekt i rëndë në linjën kryesore të ujësjellësit, Fieri prej 12 orësh pa ujë
Një defekt i rëndë në rrjetin kryesor të furnizimit me ujë ka shkaktuar ndërprerje të furnizimit në qytetin e Fierit, duke lënë prej disa orësh pa ujë mijëra qytetarë.
Sipas informacioneve, avaria ka ndodhur pranë stacionit të pompave në Kafaraj, në linjën kryesore që furnizon me ujë depot në Qafën e Koshovicës. Mësohet se një tubacion DN800, me diametër rreth 80 centimetra, ka pësuar çarje, duke sjellë ndërprerje të procesit të furnizimit të depove dhe si pasojë probleme në shpërndarjen e ujit për qytetarët.
Burime bëjnë me dije se dëmtimi konsiderohet i rëndë për shkak të rolit që kjo linjë ka në sistemin kryesor të furnizimit, pasi përmes saj realizohet transportimi i sasive të mëdha të ujit drejt depove kryesore, të cilat më pas furnizojnë zonat e ndryshme të qytetit.
Ndërkohë, grupet e punës ndodhen në terren dhe po punojnë për lokalizimin dhe riparimin e avarisë, me qëllim rikthimin sa më të shpejtë të furnizimit normal me ujë për qytetarët. Aktualisht nuk ka ende një afat zyrtar se kur pritet të rikthehet plotësisht shërbimi.
Ne do t’ju mbajmë të informuar për çdo zhvillim dhe informacion të ri lidhur me situatën.
