Aksident i rëndë në bypass-in e Fierit, plagosen katër persona, mes tyre edhe turistë të huaj
Një aksident i rëndë automobilistik është regjistruar mesditën e kësaj të mërkure në bypass-in e Fier, në afërsi të fshatit Mbrostar Ura.
Sipas informacioneve paraprake, dy automjete që po lëviznin në të njëjtin kah janë përplasur me njëra-tjetrën, duke shkaktuar lëndimin e katër personave.
Mes të plagosurve ndodhen edhe dy turistë të huaj, të cilët janë transportuar me urgjencë drejt Spitalit Rajonal të Fierit për të marrë ndihmën e nevojshme mjekësore. Burime nga spitali bëjnë me dije se të lënduarit ndodhen jashtë rrezikut për jetën.
Menjëherë pas marrjes së njoftimit, në vendngjarje kanë mbërritur shërbimet e Policisë Rrugore dhe grupet përkatëse të hetimit, të cilat kanë nisur punën për dokumentimin e plotë të ngjarjes dhe zbardhjen e rrethanave që çuan në aksident.
Ndërkohë, për shkak të aksidentit dhe ndërhyrjes së shërbimeve emergjente, qarkullimi i automjeteve në këtë segment rrugor është shoqëruar për disa minuta me vështirësi dhe lëvizje të ngadalësuar, ndërsa autoritetet po punojnë për rikthimin e normalitetit në trafik.
