Trump konfirmon pjesëmarrjen në Samitin e NATO-s në Ankara, Rubio: Një nga takimet më të rëndësishme në historinë e aleancës
Presidenti i Shteteve të Bashkuara, Donald Trump, do të marrë pjesë në Samitin e NATO-s që do të zhvillohet në Ankara të Turqisë në muajin korrik. Konfirmimi u bë nga Sekretari amerikan i Shtetit, Marco Rubio, gjatë një seance dëgjimore në Kongresin amerikan.
Rubio e cilësoi samitin e ardhshëm si një nga më të rëndësishmit në historinë e aleancës ushtarake, duke theksuar se në axhendë janë disa çështje madhore që kërkojnë zgjidhje dhe qartësim mes vendeve anëtare.
“Samiti në Turqi në korrik është ndoshta më i rëndësishmi në historinë e NATO-s, sepse ka disa çështje që duhen sqaruar dhe korrigjuar. Vetë presidenti do të marrë pjesë”, deklaroi Rubio para ligjvënësve amerikanë.
Pjesëmarrja e Trump në këtë samit vjen në një periudhë kur aleanca përballet me sfida të shumta në fushën e sigurisë, mbrojtjes dhe bashkëpunimit mes vendeve anëtare. Takimi në Ankara pritet të shërbejë si një forum kyç për diskutimin e prioriteteve strategjike të NATO-s dhe rolit të saj në skenën ndërkombëtare.
Ndërkohë, Sekretari i Shtetit përsëriti qëndrimin e Uashingtonit lidhur me përjashtimin e Turqisë nga programi i avionëve luftarakë F-35, duke theksuar se kjo çështje mbetet e rregulluar nga legjislacioni amerikan dhe nuk është objekt i ndryshimeve të menjëhershme.
Samiti i NATO-s në Ankara pritet të mbledhë krerët e shteteve dhe qeverive të vendeve anëtare, në një takim që po konsiderohet si vendimtar për drejtimin e ardhshëm të aleancës.
