Shtohen rastet e pickimeve në Fier, temperaturat e larta nxjerrin më herët zvarranikët dhe insektet helmuese
Rritja e menjëhershme e temperaturave dhe nisja e sezonit veror kanë sjellë edhe shtimin e rasteve të pickimeve nga zvarranikët dhe insektet helmuese në qarkun e Fierit.
Sipas specialistëve, këtë vit zvarranikët dhe insektet janë shfaqur më herët se zakonisht, duke rritur rrezikun veçanërisht për fermerët dhe personat që punojnë në bujqësi. Prania e tyre është konstatuar jo vetëm në zonat rurale, por edhe pranë zonave të banuara dhe qendrave urbane, duke shkaktuar shqetësim te qytetarët.
Mjeku toksikolog në Fier, Lulzim Banushaj, bën të ditur se rastet e pickimeve janë shtuar ndjeshëm këtë sezon si pasojë e temperaturave të larta.
Sipas tij, pickimet nga gjarpërinjtë apo insektet helmuese mund të shkaktojnë komplikacione serioze, veçanërisht te personat që vuajnë nga hipertensioni, sëmundjet e zemrës apo probleme të tjera shëndetësore. Për këtë arsye, ai këshillon përdorimin e veshjeve mbrojtëse, si çizmet dhe dorezat, sidomos për ata që punojnë në ara dhe sera.
Mjeku apelon që në çdo rast pickimi, qytetarët të kërkojnë menjëherë ndihmë mjekësore në urgjencë, për të marrë trajtimin e nevojshëm dhe për të shmangur komplikacionet që mund të rrezikojnë shëndetin dhe jetën.
