Berisha: “Më është hequr non grata”, ende asnjë reagim zyrtar nga SHBA
Pas më shumë se 5 vitesh nga shpallja “non grata” nga Shtetet e Bashkuara të Amerikës, kryetari i Partisë Demokratike, Sali Berisha, deklaroi se masa ndaj tij është hequr.
Lajmi u konfirmua nga vetë Berisha, i cili, ndonëse nuk iu përgjigj pyetjeve të gazetarëve, hyri në sallën e Kuvendit mes duartrokitjeve të deputetëve demokratë.
“Unë erdha, u krye”, u shpreh Berisha nga foltorja e Kuvendit.
Megjithatë, deri në këto momente nuk ka ende një reagim apo konfirmim zyrtar nga autoritetet amerikane apo nga Ambasada e SHBA-së në Tiranë lidhur me këtë pretendim. Nga verifikimet e deritanishme, nuk është publikuar asnjë njoftim zyrtar nga United States Department of State për ndryshimin e statusit të Berishës.
Kujtojmë se Berisha u shpall “non grata” nga SHBA më 19 maj 2021, me argumentin e përfshirjes në korrupsion madhor, akuzë të cilën ai e ka mohuar vazhdimisht. Deri në një konfirmim zyrtar nga pala amerikane, deklarata e kreut të PD mbetet një pretendim i bërë publik prej tij.
