Skënder Hita zgjedh drejtorin e Policisë së Lezhës, konfirmohen Erion Ahmeti në Fier dhe Edvin Ndreu në Vlorë, si dhe drejtuesit e Durrësit
Drejtori i Përgjithshëm i Policisë së Shtetit, Skënder Hita, ka emëruar oficerin e karrierës Ermal Muça në krye të Drejtorisë Vendore të Policisë Lezhë.
Pas ngjarjeve të rënda të ndodhura së fundmi në këtë qark, Hita i ka besuar drejtimin Muçës, një oficeri me eksperiencë të gjatë në radhët e Policisë së Shtetit dhe me rezultate të larta në detyrat që ka mbajtur më herët.
Ndërkohë, janë konfirmuar përfundimisht në detyrë edhe drejtuesit e tjerë vendorë që deri më tani ushtronin funksionin si të komanduar. Edvin Ndreu është emëruar përfundimisht drejtor i Policisë së Vlorës, Ervin Hodaj drejtor i Policisë së Durrësit, ndërsa Erion Ahmeti është zyrtarizuar si drejtor i Drejtorisë Vendore të Policisë Fier.
Ahmeti kishte drejtuar Policinë e Fierit në cilësinë e drejtuesit të komanduar dhe, pas përfundimit të procesit të garës, ka marrë tashmë emërimin definitiv në krye të policisë së qarkut Fier.
Emërimet vijnë në kuadër të përfundimit të procesit të përzgjedhjes së drejtuesve vendorë të Policisë së Shtetit, duke i dhënë fund periudhës së komandimeve të përkohshme në këto qarqe të vendit.
