E rëndë në autostradën Tiranë–Durrës, autobusi përplaset me trafikndarësen: bilanc tragjik me 2 viktima dhe disa të plagosur
Një aksident tragjik është regjistruar pasditen e kësaj të marte në autostradën Tiranë–Durrës, ku një autobus që ishte nisur nga Berati në drejtim të Tiranës ka humbur kontrollin dhe është përplasur me trafikndarësen.
Sipas informacioneve paraprake, në autobus udhëtonin 17 persona. Si pasojë e aksidentit, dy persona kanë humbur jetën në vendngjarje, ndërsa disa të tjerë kanë mbetur të plagosur. Të lënduarit janë transportuar me urgjencë në spital, ku po marrin ndihmën e nevojshme mjekësore.
Paraprakisht dyshohet se drejtuesi i autobusit mund të jetë përgjumur gjatë drejtimit të mjetit ose të ketë pësuar një problem shëndetësor, por shkaqet e sakta të aksidentit ende nuk janë konfirmuar dhe mbeten objekt i hetimeve.
Në vendngjarje kanë mbërritur forca të shumta policie, autoambulanca dhe ekipet e emergjencës, të cilat po punojnë për dhënien e ndihmës, normalizimin e qarkullimit dhe zbardhjen e plotë të rrethanave të kësaj ngjarjeje të rëndë.
