Aksident në unazën lindore të Fierit/ Automjeti përplaset me një banesë, plagoset rëndë një i mitur
Një aksident rrugor është regjistruar mëngjesin e sotëm në unazën lindore të qytetit të Fierit.
Sipas informacioneve paraprake, një automjet tip “Ford” ka humbur kontrollin gjatë lëvizjes, ka dalë nga rruga dhe është përplasur me një banesë në anë të saj.
Si pasojë e përplasjes, ka mbetur i plagosur një i mitur, i cili është transportuar me urgjencë në Spitalin Rajonal të Fierit. Për shkak të dëmtimeve të marra, ai është futur menjëherë në sallën e operacionit, ku po i nënshtrohet një ndërhyrjeje kirurgjikale.
Në vendngjarje kanë mbërritur shërbimet e Policisë, të cilat kanë nisur veprimet procedurale për zbardhjen e plotë të rrethanave dhe shkaqeve të aksidentit. Ndërkohë, është punuar edhe për normalizimin e qarkullimit në segmentin rrugor ku ndodhi ngjarja.
Gjendja shëndetësore e të miturit mbetet nën kujdesin e mjekëve, ndërsa pritet një njoftim zyrtar për detaje të mëtejshme.
