SPAK kërkon 5 vite burg për Fatime Kryemadhin dhe sekuestrimin e vilës në Kodrën e Diellit
Prokuroria e Posaçme Kundër Korrupsionit dhe Krimit të Organizuar (SPAK) ka paraqitur në Gjykatën e Posaçme (GJKKO) pretencën për Fatime Kryemadhin, duke kërkuar dënimin e saj me 7 vite e 6 muaj burg. Për shkak të gjykimit të shkurtuar, dënimi përfundimtar reduktohet në 5 vite burg.
Megjithatë, SPAK ka kërkuar që ekzekutimi i dënimit të pezullohet dhe Kryemadhi të vendoset në shërbim prove për një periudhë 5-vjeçare.
Po ashtu, prokuroria ka kërkuar sekuestrimin e vilës së saj në zonën e Kodrës së Diellit, si pjesë e masave të kërkuara në kuadër të procedimit penal.
Fatime Kryemadhi po gjykohet së bashku me Ema Çokon dhe Pirro Xhixhon në fraksionin e dosjes “Meta”, ku të pandehurit akuzohen për vepra penale që lidhen me pastrimin e parave dhe korrupsionin.
Gjatë paraqitjes së pretencës, prokurorët u ndalën te pasuritë, kontratat dhe burimet financiare që, sipas hetimeve, lidhen me të pandehurit. Gjithashtu, u përmendën edhe të dhënat e nxjerra nga telefoni i sekuestruar në banesën e Fatime Kryemadhit, të cilat, sipas akuzës, kanë ndihmuar në zbardhjen e elementëve të rëndësishëm të hetimit.
Në të njëjtën seancë, SPAK paraqiti edhe pretencën për Ema Çokon, për të cilën kërkoi dënimin me 7 vite burg. Me aplikimin e gjykimit të shkurtuar, dënimi reduktohet në 4 vite e 8 muaj burg.
Edhe për Ema Çokon, prokuroria ka kërkuar pezullimin e ekzekutimit të dënimit dhe vendosjen e saj në shërbim prove për një periudhë 5-vjeçare.
Procesi gjyqësor pritet të vijojë me paraqitjen e qëndrimeve të mbrojtjes, ndërsa në përfundim GJKKO do të vendosë mbi kërkesat e SPAK dhe fatin e të pandehurve.
