Aksident i rëndë në aksin Fier–Lushnjë, 4 të plagosur
Një aksident i rëndë është regjistruar këtë të hënë në aksin rrugor Fier–Lushnjë, pranë fshatit Vajkan.
Sipas informacioneve paraprake, dy automjete janë përplasur me njëra-tjetrën dhe, si pasojë e përplasjes së fortë, kanë përfunduar në kanalin anësor të rrugës.
Nga aksidenti kanë mbetur të plagosur katër persona, të cilët janë transportuar me urgjencë në Spitalin Rajonal të Fierit. Burime paraprake bëjnë me dije se të lënduarit ndodhen jashtë rrezikut për jetën.
Për shkak të aksidentit, njëra korsi e rrugës është bllokuar, duke krijuar radhë të gjata automjetesh në aksin Fier–Lushnjë, ku gjatë sezonit veror qarkullimi është mjaft i lartë.
Shërbimet e Policisë ndodhen në vendngjarje dhe po punojnë për zbardhjen e shkaqeve dhe rrethanave të aksidentit, si edhe për normalizimin e qarkullimit në këtë segment rrugor.
