Seri zjarresh të dyshuara si të qëllimshme në Durrës, digjen 10 kazanë mbetjesh dhe dëmtohen 3 automjete
Një seri zjarresh të dyshuara si të qëllimshme ka alarmuar qytetin e Durrësit në orët e para të mëngjesit, duke shkaktuar djegien e 10 kazanëve të mbetjeve dhe dëmtimin e tre automjeteve të parkuara pranë tyre.
Ngjarja e parë është regjistruar në rrugën “Enver Velja”, pranë shkollës 9-vjeçare “Kushtrimi i Lirisë”, ku tetë kazanë mbetjesh janë përfshirë nga flakët. Për shkak të përhapjes së shpejtë të zjarrit, janë dëmtuar edhe tre automjete të parkuara në afërsi.
Pak minuta më vonë, dy vatra të tjera zjarri janë shfaqur në rrugën “Mujo Ulqinaku”, ku janë djegur edhe dy kazanë të tjerë, duke e çuar në 10 numrin total të kazanëve të shkrumbuar.
Shërbimi zjarrfikës ka ndërhyrë menjëherë në të gjitha rastet, duke bërë të mundur izolimin e flakëve dhe shmangien e përhapjes së tyre në zona të tjera.
Sipas të dhënave paraprake, dyshohet se zjarret janë vendosur qëllimisht dhe se pas të gjitha rasteve fshihet i njëjti autor. Hetimet paraprake tregojnë se autori i dyshuar ka lëvizur nga rruga “Enver Velja”, ku dyshohet se i ka vënë zjarrin tetë kazanëve, drejt rrugës “Mujo Ulqinaku”, ku më pas janë djegur edhe dy kazanë të tjerë.
Policia ka nisur hetimet për identifikimin dhe kapjen e autorit, ndërsa po punohet për zbardhjen e plotë të rrethanave të kësaj ngjarjeje.
