Fluks i lartë mjetesh në Morinë, pushuesit nga Kosova i drejtohen bregdetit shqiptar në kulmin e sezonit turistik
Në pikun e sezonit turistik, qindra automjete po largohen nga Kosova për t’iu drejtuar Shqipërisë, duke shkaktuar një fluks mjaft të lartë lëvizjeje në pikën kufitare të Morinës.
Ngarkesa e automjeteve është mjaft e dukshme përgjatë Rrugës së Kombit, veçanërisht në segmentin që lidh doganën e Morinit me Pikën e Pagesës, ku qarkullimi është dendësuar ndjeshëm.
Për të përballuar fluksin e madh të udhëtarëve dhe për të parandaluar krijimin e radhëve të gjata, në pikën kufitare po punohet me të gjitha sportelet në dispozicion. Masa të ngjashme menaxhimi janë ndërmarrë edhe te Pika e Pagesës së Rrugës së Kombit, me qëllim lehtësimin e kalimit dhe shmangien e vonesave.
Autoritetet parashikojnë se ky fluks i lartë automjetesh do të vijojë gjatë gjithë fundjavës, meqenëse me mijëra qytetarë nga Kosova kanë zgjedhur bregdetin shqiptar për të kaluar pushimet e tyre verore.
