Zjarr në Darëzezë, ndërhyrja e shpejtë e zjarrfikëses parandalon përhapjen drejt pyllit
Një zjarr ka rënë mesditën e sotme në zonën e Darëzezës, në një territor pranë sipërfaqeve pyjore. Flakët kanë përfshirë shkurre dhe mbeturina, duke krijuar rrezik për përhapjen e zjarrit drejt zonës së pyllëzuar.
Pas marrjes së njoftimit, forcat zjarrfikëse kanë ndërhyrë menjëherë në terren, duke bërë të mundur izolimin dhe shuarjen e flakëve në një kohë të shkurtër.
Ndërhyrja e shpejtë është favorizuar edhe nga afërsia e stacionit zjarrfikës në Topojë me zonën e Darëzezës, çka ka mundësuar mbërritjen e shërbimeve në kohë dhe parandalimin e përhapjes së mëtejshme të zjarrit.
Fatmirësisht, situata është neutralizuar pa pasoja për banesat apo personat. Nuk raportohet për të lënduar, ndërsa falë ndërhyrjes së menjëhershme u shmang përhapja e flakëve drejt zonës pyjore.
