Zjarr i fuqishëm shkrumbon resortin përgjatë aksit Sarandë–Syri i Kaltër
Një zjarr i fuqishëm ka përfshirë rreth orës 05:30 të mëngjesit të kësaj të diele një resort përgjatë rrugës Sarandë–Syri i Kaltër, në zonën e Mesopotamit.
Flakët kanë përfshirë të gjithë resortin, duke e shkrumbuar thuajse plotësisht. Fatmirësisht, deri në këto momente nuk raportohet për persona të lënduar, ndërsa dëmet materiale janë të konsiderueshme.
Për momentin nuk dihen shkaqet e rënies së zjarrit. Hetimet dhe verifikimet në vendngjarje pritet të përcaktojnë rrethanat e ngjarjes dhe origjinën e flakëve.
Resorti ishte ndërtuar rreth tre vite më parë dhe konsiderohej një prej investimeve të rëndësishme turistike në zonën e Mesopotamit, duke u kthyer në një pikë të njohur përgjatë aksit rrugor që lidh Sarandën me Syrin e Kaltër.
Zjarri në resortin e Sarandës vjen në një mëngjes të shoqëruar edhe nga një tjetër incident i rëndë, ai i regjistruar në një hotel në Lungomaren e Vlorës.
Nga zjarri në Vlorë janë lënduar 6 persona, 5 prej të cilëve janë transportuar për trajtim të specializuar në Tiranë, ndërsa dy prej tyre raportohet se kanë pësuar djegie të rënda.
Autoritetet po vijojnë hetimet për të zbardhur shkaqet dhe rrethanat e të dyja ngjarjeve.
