Palasë/ Dhunoi dhe kanosi bashkëshorten, arrestohet në flagrancë 40-vjeçari
Një 40-vjeçar është arrestuar në flagrancë nga Policia në Palasë, pasi dyshohet se ka dhunuar dhe kanosur bashkëshorten e tij.
Ngjarja është raportuar rreth orës 13:40, pas një konflikti familjar në një vilë brenda një kompleksi në zonën e Palasës. Menjëherë pas marrjes së njoftimit, në vendngjarje kanë shkuar shërbimet e Patrullës së Zonës, ndërsa për neutralizimin e situatës janë angazhuar edhe forca shtesë të Stacionit të Policisë Dhërmi.
Gjatë ndërhyrjes në banesë, Policia ka gjetur dhe sekuestruar një armë zjarri, pistoletë.
Në vijim të veprimeve hetimore, gjatë kontrollit të banesës së 40-vjeçarit në Tiranë, me mbështetjen e Drejtorisë Vendore të Policisë Tiranë, janë gjetur dhe sekuestruar edhe dy pako me municion luftarak dhe dy krehra me fishekë.
Nga verifikimet paraprake rezulton se shtetasi Ervis Kosova dyshohet se ka ushtruar dhunë dhe ka kanosur bashkëshorten e tij.
Ndërhyrja e menjëhershme e shërbimeve të Policisë bëri të mundur neutralizimin e situatës dhe parandalimin e përshkallëzimit të mëtejshëm të konfliktit, duke shmangur një ngjarje potencialisht të rëndë.
Ervis Kosova është arrestuar në flagrancë dhe është shoqëruar nga Forca Kombëtare e Sigurisë, Njësia Fier, në ambientet e Policisë. Ndërkohë, vijojnë veprimet procedurale për dokumentimin e plotë të ngjarjes dhe përcaktimin e përgjegjësive ligjore.
