Fierit i ndërpritet uji në mes të temperaturave të larta, ndërhyrja e nevojshme, por a ishte ky momenti i duhur?
FIER – Ndërprerja e furnizimit me ujë në të gjithë zonën urbane të Fierit dhe pjesërisht në zonat rurale, duke nisur nga ora 20:30 e mbrëmjes së sotme, ka ngritur pikëpyetje për kohën e zgjedhur për kryerjen e punimeve.
Sipas njoftimit, ndërhyrja do të bëhet për pastrimin e depove të ujit dhe realizimin e bypass-it për lidhjen e depove me Stacionin e Ri, me synim vënien e tij në funksion, zëvendësimin e sistemit të vjetër dhe rritjen e kapaciteteve të furnizimit.
Ndërhyrja është e rëndësishme si për higjienën dhe mirëmbajtjen e depove, ashtu edhe për përmirësimin e sistemit dhe rritjen e volumit të ujit në dispozicion të qytetit. Megjithatë, problem mbetet momenti në të cilin po realizohen këto punime.
Fieri po përballet me temperatura që shkojnë rreth 35 gradë Celsius, ndërsa ndërprerja e ujit për disa orë, veçanërisht gjatë një periudhe ende të nxehtë të vitit, krijon vështirësi të konsiderueshme për familjet.
Situata bëhet edhe më problematike në pallatet e banimit, ku jo të gjithë banorët kanë mundësi të depozitojnë paraprakisht sasi të konsiderueshme uji. Në temperatura të larta, nevoja për ujë është e shtuar, jo vetëm për konsum, por edhe për higjienën personale dhe nevojat e përditshme familjare.
Pyetja që shtrohet është nëse një ndërhyrje e tillë, pavarësisht rëndësisë së saj, mund të ishte planifikuar në një periudhë me temperatura më të ulëta, duke minimizuar shqetësimin dhe vështirësitë për banorët.
Sipas njoftimit, furnizimi me ujë pritet të rikthehet nesër, më 3 shtator, rreth orës 12:00.
Ndërkohë, banorët këshillohen të marrin masat e nevojshme për sigurimin e ujit gjatë periudhës së ndërprerjes.
