Skrapar/ Kultivonin kanabis në pyll, arrestohet 22-vjeçari, në kërkim bashkëpunëtori i armatosur
Një 22-vjeçar është arrestuar në flagrancë në Skrapar, pasi dyshohet se kultivonte bimë narkotike në një zonë pyjore të fshatit Dobrenjë.
Operacioni i koduar “Dobrenjë” u finalizua pas një hetimi njëmujor nga shërbimet e Komisariatit të Policisë Skrapar, në bashkëpunim me Prokurorinë.
Gjatë ndërhyrjes në zonën pyjore u gjetën 31 bimë të dyshuara Cannabis Sativa, ndërsa pranë tyre u kap 22-vjeçari T. H., banues në fshatin Rromas, i cili u arrestua në flagrancë.
Në vijim të operacionit është shpallur në kërkim bashkëpunëtori i tij, Q. M., 22 vjeç, banues në Dobrenjë. Sipas Policisë, sapo konstatoi praninë e shërbimeve, ai hodhi në tokë një armë zjarri kallashnikov dhe u largua me vrap në zonën e pyllëzuar.
Policia vijon punën për lokalizimin dhe kapjen e tij.
Ndërkohë, bimët narkotike u asgjësuan, ndërsa arma e zjarrit u sekuestrua në cilësinë e provës materiale.
Materialet procedurale i janë referuar Prokurorisë për veprime të mëtejshme.
