Shtatzënë në muajin e shtatë, 23-vjeçarja denoncon ish-partnerin për kërcënime
Një 23-vjeçare, e cila ndodhet në muajin e shtatë të shtatzënisë dhe ka një fëmijë 3 vjeç e gjysmë nga një lidhje e mëparshme, ka bërë kallëzim në polici ndaj ish-partnerit të saj, një shtetas shqiptar.
Sipas raportimeve të mediave greke, e reja ka pretenduar se prej kohësh përballet me ngacmime dhe kërcënime të vazhdueshme nga ish-partneri, i cili dyshohet se vijon të tentojë të ketë kontakte me të.
Incidenti më i fundit raportohet të ketë ndodhur në një kënd lojërash. 23-vjeçarja ka deklaruar se ish-partneri i është afruar dhe e ka kërcënuar.
Pas situatës së krijuar, gruaja shtatzënë ka pësuar një tronditje të fortë psikologjike dhe është transportuar në spital, ku ka marrë ndihmën e nevojshme mjekësore dhe është mbajtur nën vëzhgim.
Pas denoncimit, autoritetet kanë marrë masa për mbrojtjen e 23-vjeçares, ndërsa policia po ndjek situatën për shkak të pretendimeve se ish-partneri vijon të tentojë kontaktin me të.
Ngjarja është raportuar vetëm pak orë pas një tjetër episodi të rëndë në të njëjtën zonë, ku një 32-vjeçare dhe partneri i saj aktual u plagosën me thikë brenda banesës së tyre.
Për këtë sulm, dyshimet janë drejtuar ndaj ish-partnerit të gruas. Sipas raportimeve, ndaj tij ishin bërë më herët pesë kallëzime, katër prej të cilave për raste të lidhura me dhunën në familje.
Hetimet për të dyja ngjarjet vijojnë, ndërsa autoritetet po verifikojnë rrethanat dhe pretendimet e bëra nga personat e përfshirë.
