Vrasje e dyfishtë në Bathore të Kamzës, efektivi i Policisë Ushtarake vret dy vëllezër dhe plagos të tretin
Konflikti mes fqinjëve dyshohet se nisi për një mur rrethues në oborrin e banesave. Autori i dyshuar, rreth 40 vjeç, është arrestuar nga policia.
Një ngjarje e rëndë kriminale është regjistruar në Bathore të Kamzës, ku dy vëllezër kanë humbur jetën dhe vëllai i tyre ka mbetur i plagosur, pasi u qëlluan me armë zjarri nga një efektiv i Policisë Ushtarake.
Viktimat janë identifikuar si Selam Islamaj, rreth 30 vjeç, dhe Nazmi Islamaj, 48 vjeç. Ndërsa i plagosur ka mbetur Shefqet Islamaj, rreth 44 vjeç, i cili ndodhet nën kujdesin e mjekëve.
Sipas të dhënave paraprake, autori i dyshuar është Ngushëllim Manzi, rreth 40 vjeç, punonjës i Policisë Ushtarake. Ai dhe tre vëllezërit kanë qenë fqinjë, ndërsa shkak i konfliktit dyshohet të jetë bërë një mur rrethues në oborrin e banesave.
Sipas njoftimit të Policisë, konflikti për motive të dobëta është përshkallëzuar deri në përdorimin e armës së zjarrit. Si pasojë, Selam Islamaj humbi jetën në vendngjarje, ndërsa Nazmi Islamaj dhe Shefqet Islamaj u transportuan në spital. Pavarësisht ndihmës mjekësore, 48-vjeçari Nazmi Islamaj nuk arriti të mbijetojë.
Pas marrjes së njoftimit për të shtëna me armë zjarri në rrugën “Petrela”, në Bathore, shërbimet e Komisariatit të Policisë Nr. 5 mbërritën në vendngjarje dhe bënë të mundur kapjen dhe arrestimin e autorit të dyshuar.
Gjatë veprimeve hetimore, policia sekuestroi edhe pistoletën që dyshohet se u përdor në krim.
Grupi hetimor po vijon punën për dokumentimin e plotë ligjor të ngjarjes dhe sqarimin e rrethanave që çuan në këtë tragjedi.
Burimi: Policia e Shtetit
