Programi “Pas Shkolle” deri në orën 17:00, nga janari 2027! 500 milionë lekë për zgjerimin në të gjithë vendin
Programi “Pas Shkolle” do të zgjerohet gradualisht në rang kombëtar, duke u ofruar nxënësve më shumë mundësi për aktivitete edukative dhe prindërve një mbështetje konkrete për kujdesin ndaj fëmijëve pas përfundimit të orarit mësimor.
Për këtë qëllim, në buxhetin e vitit 2027 janë parashikuar 500 milionë lekë, të cilat do të shërbejnë për zgjerimin e programit dhe shtimin e larmisë së klubeve dhe aktiviteteve që do të zhvillohen në shkolla.
Sipas planit të bërë publik, nga janari i vitit 2027, programi do të ofrojë qëndrim dhe aktivitete për nxënësit deri në orën 17:00. Kjo do t’u japë fëmijëve më shumë kohë për të mësuar, për të zhvilluar aftësitë dhe talentet e tyre, si dhe për t’u angazhuar në veprimtari të ndryshme jashtë programit të zakonshëm mësimor.
Një nga objektivat kryesorë të këtij programi është edhe lehtësimi i prindërve që, për shkak të angazhimeve profesionale, nuk kanë mundësi të kujdesen për fëmijët menjëherë pas përfundimit të mësimit.
Përmes “Pas Shkolle”, synohet të ofrohet një zgjidhje falas, e sigurt dhe cilësore, ku fëmijët mund të qëndrojnë në ambientet e shkollës dhe të marrin pjesë në aktivitete të organizuara deri në orën 17:00.
Zgjerimi i programit pritet të bëhet gradualisht në shkolla të ndryshme të vendit, me synimin për ta kthyer atë në një shërbim të aksesueshëm për sa më shumë nxënës dhe familje.
