Parlamenti francez voton për ndalimin e cigareve elektronike njëpërdorimshme
Parlamenti francez votoi për ndalimin e cigareve elektronike me përdorim të vetëm, të konsideruara si porta hyrëse për varësinë ndaj duhanit për adoleshentët dhe të dëmshme për mjedisin.
Projektligji u miratua nga parlamenti francez me një votim përfundimtar në dhomën e lartë të Senatit. Franca tani bëhet vendi i dytë i BE-së pas Belgjikës që ka vendosur një ndalim të tillë.
Cigaret elektronike njëpërdorimshme të mbushura paraprakisht, të njohura si “pufka”, janë të njohura për të rinjtë, mund të kenë një përmbajtje të lartë nikotine, vijnë në shumë shije duke përfshirë mollën, shalqirin dhe kola-kolën dhe janë të lira.
“Është një fitore e madhe në një betejë me dy drejtime që po luftonim: një betejë mjedisore kundër baterive ndotëse të litiumit dhe një betejë shëndetësore për nxënësit tanë të shkollës,” tha për Agence France-Presse (AFP) ligjvënësja Francesca Pasquini, autore e projektligjit. “Një punë e shkëlqyer ndërpartiake!”, tha Ligjvënësi Michel Lauzzana në X.
Duke iu drejtuar presidentit Emmanuel Macron, Lauzzana shtoi: “Tani jemi në pritje të shpalljes së këtij ligji dhe zbatimit të tij në të gjithë vendin”.
Legjislacioni u miratua më herët nga dhoma e ulët e Asamblesë Kombëtare. Masa është pjesë e një fushate më të gjerë të qeverisë kundër duhanit.
Autoritetet shëndetësore në Francë dhe Belgjikë thonë se konsumimi kronik i nikotinës është veçanërisht i dëmshëm për trurin e adoleshentëve dhe mund të inkurajojë përdorimin e barnave të tjera. Në dhjetor 2024, Belgjika miratoi legjislacionin për t’u bërë vendi i parë i BE-së që ndalon cigaret elektronike të njëpërdorshme.
Bashkimi Evropian synon të arrijë një gjenerim pa duhan deri në vitin 2040, duke reduktuar popullsinë e duhanpirësve të bllokut 27-vendesh nga rreth 25 përqind tani në më pak se pesë përqind të totalit.
