Pëllumb Mehmetaj i jepet titulli “Qytetar Nderi” i Mallakastrës në Ditën e Mësuesit nga kryebashkiaku Qerimaj.
Në kuadër të 7 Marsit, Bashkia Mallakastër organizoi një ceremoni festive në qytetin e Ballshit, ku nderoi mësuesit për kontributin e tyre në edukimin dhe arsimimin e brezave të rinj. Në këtë aktivitet, kryetari i Bashkisë Mallakastër, Qerim Ismailaj, i dorëzoi titullin “Qytetar Nderi” mësuesit të fizikës, Pëllumb Mehmetaj, si shenjë mirënjohjeje për punën dhe përkushtimin e tij shumëvjeçar në arsim.
Titulli u akordua nga Këshilli Bashkiak me motivacionin: “Për kontributin e dhënë në fushën e mësimdhënies, përhapjen e dijes, kulturës si dhe në edukimin e brezave”. Mehmetaj ka një karrierë të gjatë si mësues i fizikës, i diplomuar në Fakultetin e Shkencave të Natyrës, dhe ka mbajtur disa pozicione drejtuese, përfshirë atë të kryetarit të ish-Komunës Kutë, drejtuesit të ZVAP Mallakastër dhe drejtorit të gjimnazit “Dervish Hekali” në Ballsh.
Në ceremoni morën pjesë përfaqësues të pushtetit lokal, deputetë të zonës, personalitete të arsimit dhe familjarë të tij, të cilët shprehën mirënjohjen për kontributin e tij në edukimin e brezave. Aktiviteti vijoi me një program artistik, ku nxënësit e shkollave 9-vjeçare performuan në nder të mësuesve.
