Fier – Dita Botërore e Bletëve: Vlerësohet bletaristi fierak Fredinand Muskaj, një nga më të mëdhenjtë në vend
Sot, më 20 maj, bota kremton Ditën Ndërkombëtare të Bletëve, një datë që ka për qëllim të ndërgjegjësojë opinionin publik mbi rëndësinë jetike që kanë bletët dhe insektet e tjera polenizuese për ekosistemin dhe sigurinë ushqimore. Kjo ditë është shpallur nga Organizata e Kombeve të Bashkuara në vitin 2017, për të nderuar ditëlindjen e Anton Janša, pionier i bletarisë moderne nga Sllovenia, dhe për të theksuar rolin e bletëve në ruajtjen e biodiversitetit dhe në bujqësinë e qëndrueshme.
Në këtë kuadër, në Fier u vlerësua puna e Fredinand Muskajt, një prej bletarëve më të njohur të qarkut, i cili me përkushtim e pasion prej shumë vitesh kontribuon në zhvillimin e kësaj fushe kaq të rëndësishme. Muskaj është administrator i mbi 500 kosheresh, të shpërndara në tre parqe të mëdha bletësh në Dhërmi, Seman dhe Pojan.
Përvoja dhe serioziteti i tij e kanë bërë atë një pikë referimi për bletarinë në Fier dhe më gjerë, duke sjellë produkte natyrale cilësore në treg dhe duke ndihmuar në ruajtjen e ekosistemit përmes polenizimit.
“Bletët nuk janë vetëm prodhues të mjaltit, por janë punëtore të heshtura që mbajnë në këmbë gjithë zinxhirin ushqimor dhe jetën në planet,” tha Muskaj në një prononcim të shkurtër për mediat lokale.
Dita Botërore e Bletëve është një thirrje për veprim ndaj rënies së numrit të bletëve në botë për shkak të pesticideve, ndotjes dhe humbjes së habitateve. Ajo na kujton se mbështetja për bletarinë dhe fermerët si Fredinand Muskaj është më e rëndësishme se kurrë më parë.
