Fluks i shtuar i grave dhe vajzave për mamografi në Spitalin Rajonal të Fierit
Spitali Rajonal i Fierit po përballet në këto ditë të para të tetorit me një fluks të shtuar të grave dhe vajzave që kryejnë mamografinë. Rritja e interesit vjen në kuadër të “Tetorit Roz”, muajit të ndërgjegjësimit për parandalimin dhe zbulimin e hershëm të kancerit të gjirit.
Sipas mjekes onkologe Anisa Mone, pavarësisht fushatave ndërgjegjësuese që zhvillohen jo vetëm gjatë muajit tetor, por gjatë gjithë vitit, numri i pacienteve të diagnostikuara me kancer gjiri vazhdon të jetë në rritje.
“Ndër shkaqet kryesore që ndikojnë në shtimin e rasteve janë jeta sedentare, kequshqyerja, lindjet në moshë të madhe, mosushqyerja e fëmijëve me gji, faktorët gjenetikë dhe, më e rëndësishmja, neglizhimi për të kryer kontrollin në fazat fillestare”, – theksoi mjekja Mone.
Ajo shtoi se grupmosha më e prekur mbetet ajo 50-70 vjeç, por fatkeqësisht janë regjistruar raste edhe në moshat 40-vjeçare dhe, më rrallë, edhe më të reja. Po ashtu, janë evidentuar edhe tre raste me kancer gjiri tek meshkujt.
Mjekja onkologe thekson se përveç rritjes së rasteve me kancer gjiri, po vërehet edhe një shtim i të gjitha llojeve të sëmundjeve malinje. Një numër i vogël pacientësh fatkeqësisht nuk e ka fituar betejën me sëmundjen, pasi ajo është zbuluar në stade të avancuara.
Nga ana tjetër, Mone nënvizoi se prej katër vitesh në Spitalin Rajonal të Fierit ofrohet shërbimi i kimioterapisë, çka ka lehtësuar ndjeshëm trajtimin e pacientëve, të cilët më parë detyroheshin të udhëtonin drejt Tiranës për të marrë këtë shërbim.
Marsela Topi / Fieri Web
