Aksident i trefishtë në autostradën Rrogozhinë–Lushnjë, një person përfundon në spital
Një aksident i rëndë rrugor, ku janë përfshirë tre automjete, është regjistruar mbrëmjen e kësaj të diele në autostradën Rrogozhinë–Lushnjë.
Aksidenti ka ndodhur pranë rrethrrotullimit të Grabjanit, në kahun e lëvizjes drejt Lushnjës, ku tre automjete janë përplasur njëri pas tjetrit.
Si pasojë e përplasjes, njëri prej drejtuesve të mjeteve ka mbetur i plagosur dhe është transportuar në Spitalin e Lushnjës, ku po merr ndihmën mjekësore. Sipas informacioneve paraprake, ai ka pësuar disa lëndime, por ndodhet jashtë rrezikut për jetën.
Nga të dhënat paraprake dyshohet se shkak i aksidentit është bërë një automjet tjetër, i cili është përmbysur pasi drejtuesi ka humbur kontrollin. Për të shmangur përplasjen me të, një automjet tip Benz ka frenuar, ndërsa dy mjetet e tjera janë përplasur në seri.
Në vendngjarje kanë mbërritur shërbimet e Policisë Rrugore, të cilat po punojnë për disiplinimin e trafikut, si dhe grupi hetimor që po dokumenton rrethanat e aksidentit.
Gjithashtu, në vendngjarje ndodhen edhe shërbimet zjarrfikëse të Lushnjës, të cilat po kujdesen për pastrimin e karrexhatës nga mbetjet e automjeteve të përfshira në aksident.
Përplasja ka shkaktuar rëndim të qarkullimit në këtë segment të autostradës.
