Aksident në autostradën Lushnjë–Fier, përplasen një Volkswagen dhe një minifurgon te “Pushimi i Shoferit”, një i plagosur
Një aksident rrugor është regjistruar mëngjesin e sotëm në kryqëzimin e njohur si “Pushimi i Shoferit”, në autostradën Lushnjë–Fier.
Sipas informacioneve paraprake, një automjet tip Volkswagen, që po hynte në autostradë nga rruga dytësore, është përplasur me një minifurgon që po lëvizte në drejtim të Fierit.
Si pasojë e përplasjes, është plagosur drejtuesi i Volkswagen-it, i cili është transportuar në Spitalin e Lushnjës për të marrë ndihmë mjekësore. Burime paraprake bëjnë me dije se ai ndodhet jashtë rrezikut për jetën.
Në vendngjarje kanë mbërritur shërbimet e Policisë Rrugore, të cilat po menaxhojnë qarkullimin e automjeteve dhe po punojnë për zbardhjen e plotë të shkaqeve dhe rrethanave të aksidentit.
Kryqëzimi te “Pushimi i Shoferit” është konsideruar prej vitesh një nga pikat më problematike në këtë aks rrugor, ku janë regjistruar vazhdimisht aksidente.
