Alarm për mot ekstrem në Ballkan, stuhi të fuqishme drejt rajonit – Shqipëria në Nivelin 1 të rrezikut
Ballkani pritet të përballet me një nga episodet më të forta të motit ekstrem të kësaj vere. Qendra Evropiane për Parashikimin e Stuhive ka lëshuar nivelin më të lartë të alarmit (Niveli 3) për një pjesë të rajonit, duke paralajmëruar zhvillimin e stuhive të rrezikshme nga dita e martë deri në orët e para të së mërkurës.
Sipas parashikimeve, zonat më të rrezikuara janë jugu i Kroacisë, jugu i Bosnjë-Hercegovinës, Mali i Zi dhe Kosova, ku priten reshje intensive, erëra të forta, breshër dhe aktivitet i lartë elektrik.
Ndërkohë, Shqipëria është përfshirë në zonën e Nivelit 1 të rrezikut, që nënkupton mundësi për stuhi lokale, reshje të dendura në periudha të shkurtra, shkarkesa elektrike dhe erëra të forta, kryesisht në zonat malore dhe ato veriore.
Autoritetet u bëjnë thirrje qytetarëve të ndjekin njoftimet zyrtare të motit dhe të tregojnë kujdes gjatë lëvizjeve në zonat ku mund të shfaqen fenomene të forta atmosferike.
