Atentati në Shkodër, policia: U qëllua nga motori në drejtim të një automjeti të parkuar në pronësi të…
Mbrëmjen e sotme, rreth orës 20:10, në lagjen Partizani, në zonën e Sheshit Rus në Shkodër, një person i paidentifikuar që qarkullonte me një motomjet pa targa ka qëlluar me armë zjarri drejt një automjeti tip Peugeot të parkuar, në pronësi të shtetasit Elvis Hoxha.
Nga të shtënat janë shkaktuar vetëm dëme materiale në automjetin e shtetasit Hoxha, si dhe dëmtime të lehta në një automjet tjetër të parkuar pranë. Fatmirësisht, nuk raportohet për të lënduar.
Policia dhe grupi hetimor mbërritën menjëherë në vendngjarje dhe po punojnë për identifikimin dhe kapjen e autorit dhe bashkëpunëtorit të tij, që dyshohet se drejtonte motomjetin. Janë ngritur pika kontrolli dhe po ushtrohen kontrolle intensive në zonë dhe në ambiente të ndryshme për të ndaluar të dyshuarit.
Hetimet vijojnë për zbardhjen e motiveve dhe rrethanave të kësaj ngjarjeje.
